Disimulen #26 - Cuac FM - 29 de abril de 2013

Disimulen

Conversamos coa musicóloga Lorena López Cobas, autora de 'Historia da música en Galicia' (Ouvirmos, 2013), primeira obra destas características, global, se ben centrada na música culta, que se publica no país. Averiguamos tamén algo máis sobre Adtlántida.tv, un proxecto de creación de infraestruturas tecnolóxicas para unha radiotelevisión libre, da man de Berio Molina, un dos seus promotores. O poeta e xornalista Daniel entrega outro 'Calypso Frelimo', neste caso a medio camiño entre The Pop Group e o John Lennon revoltado de 'Some Time In New York City'. Óscar Vilariño (A Veces Ciclón), Abel Dobarro (Estrambote) e o comentarista musical Xavier Valiño cóntannos por que Acuarela foi importante para eles e recomendan algunhas cancións do catálogo histórico do selo, que cumpre este ano dúas décadas. A semana que vén completaremos o tributo cunha entrevista co seu responsábel, Jesús Llorente. Na banda sonora, ademais das mostras de música culta que acompañan o libro de Lorena López Cobas, soan Señor Chinarro, Efterklang, Los Planetas, John Lennon, Yoko Ono, Frank Zappa, The Mothers Of Invention, The Pop Group, Flow e Mus. 'Disimulen' é un programa sen sintonía en Cuac FM, a radio comunitaria da Coruña, que dende comezos de abril tamén se pode escoitar en diferido en RadioFilispiM. Conduce e dirixe: Iago Martínez.