Disimulen #33 - Cuac FM - 15 de xullo de 2013

Disimulen

Último programa da tempada, dedicado a repasar algunhas das películas e entrevistas a cineastas que protagonizaron este espazo sen sintonía en Cuac FM. Facémolo canda o crítico e programador José Manuel Sande, colaborador habitual do Disimulen. Ademais dalgunhas reflexións xerais sobre o fenómeno do Novo Cinema Galego ás que convén regresar nalgún momento, lembramos o paso polo Disimulen de fitas como 'Fóra', de Pablo Cayuela e Xan Gómez Viñas; 'VidaExtra', de Ramiro Ledo; 'A cicatriz branca', de Margarita Ledo; 'O quinto evanxeo de Gaspar Hauser', de Alberto Gracia; 'Arraianos', de Eloy Enciso; ou 'Montaña en sombra', de Lois Patiño. Na banda sonora, Caxade, The Lost Omelette-Makers, Das Kapital, Jessica Pratt, Efterklang, Malandrómeda e Sr Chinarro. Tamén volvemos escoitar 'Insectos', do segundo disco de Das Kapital, desta vez por unha nova razón: os composteláns tocarán por primeira vez na Coruña o vindeiro 20 de xullo a partir das 22 horas, na festa de despedida desta primeira tempada do Disimulen. Será na sala Mardi Gras, xunto aos locais Volonté. Antes, ás 20h na Casa da Fariña, presentación na cidade do proxecto discográfico Discos da Máquina, ao que se veñen de incorporar Caxade e The Lost Omelette-Makers. 'Disimulen' é un programa sen sintonía en Cuac FM, a radio comunitaria da Coruña, que dende comezos de abril tamén se pode escoitar en diferido en RadioFilispiM. Conduce e dirixe: Iago Martínez.